برات کشی ءُ ناتپاکی

(محمد کریم بلوچ)
مئی راجدپترءِ یک بژنیگی بهرے وت ماں وتی جیڑه ءُ برات کشی یانی باروانت۰ چه چاکر شیهک ءُ میر گوهرام نودبندگ ءِ دور بگر تاں مروچی همے اڑ ءُ مشکل راجی جهد ءِ مزنیں دیمپانے بوتگ۰

ما را منّگی انت که بلوچ راج ءِ دژمناں چه اے اڑ ءُ مئی ناتپاکی ءَ باز نپ ءُ سیت رستگ۰

بلوچانی هنوگیں لدیگی دژمن گوں وتی انسان دژمنیں پندلاں ءُ اے دیمپان ءِ مزن کنگ ءَ لوٹنت مئے راجی وجود ءُ پجّارءَ آس ماں دارنت۰ آ لوٹنت ما گار بئین ءُ مئے راجے پجّار گمسار به بیت۰ برات کشی ماں بلوچستانءِ رودراتکی ءُ رونشتی بهراں دیرانت چه انداز ءَ گوستگ۰

شومیں ۱۹۲۸ میلادی سال ءَ بگر تاں مروچی بے شمار بلوچ ماں وت ماں وتی جنگاں بیران ءُ بیگواه بوتگنت۰

هچ کس یا اداره یے نزانت که چنت هزار بلوچءِ زند برات کشی ءِ سَوَب ءَ سُوتکگ انت۰

ایش که سرجم ءَ چنت هزار شیر زالیں مات سوگیگ بوتگ ءُ چنکه گوهار جنوزامی پچ گور کتگ انت ءُ ملک ءِ یتیم ءُ چوره یانی هساب چنکرانت هچ کس یا هوربندے ءَ مالوم نهنت۰ اگاں چه بلوچانی بربادی ءُ تباهی دژمن ءِ لوٹ اَنت بلئے هما بلوچ که برات کشی کنگا ینت هم باز میاریگ انت۰ آ گوں وتی دست ءُ دژمن ءِ تپَر وتی باسکاں وت گڈِّ اتگ انت۰ آ دژمناں شاد کتگ ءُ بلوچان سوگیگ۰

یک دورے چاکرشیهک تُرک ءُ پٹاں آورت انت ءُ لوٹت لاشاری یاں ولگوج بکنت ءُ هستنت هنچیں بد نسیب ءُ ناسرپدیں بلوچ که مروچی گوں درآمداں هوارنت ءُ برات کشی جنگ ءِ آس اِش ماں بلوچستان رُوک داشتگ۰
چه همے ناهودگیں جنگ ءُ برات کشی یاں دشمناں باز سُوب کتگ ءُ بلوچ راج ءُ بلوچستان ءِ جنزءَ سکّ باز تاوان رستگ۰
په ما بلوچاں دگه راهے بید چه تپاکی ءُ راجی جهد پَشت نه کپتگ. ما گوں تپاکی ءُ هوربندی جهداں توانیں درآمداں پروش بدئین ءُ وتی ڈیه ءُ مُلک ءُ وتی راجی پجّار ءَ به رکّینین ءُ په وتی پدریچاں روشنیں باندات ءُ گهتریں زندے ءِ بندات ایر بکنیں!