بلوچستان ءِ راجی تپاکی گلّ ءِ بُنگیج ءِ جار

بلوچستان ءِ راجی تپاکی گلّ ءِ بُنگیج ءِ جار

بلوچستان ءِ راجی تپاکی گلّ ءِ بُنگیج ءِ جار

گنجیں بلوچستان ءِ بلوچ راج ، جهان ءُ همساهگیں ایردستیں راجاں  ءُ  دُگنیا ءِ تمامیں آزات هیالیں مهلوک!
مئے راجدپتر گواه اِنت کہ شاهگانیں بلوچستان کرنانی کرن بلوچ واکدارانی دست ءَ  ءُ بلوچ راج وتی ڈیھہ ءِ مَستر وت بوتگ.  بلے انگریزاں هور گوں وتی هَندی واکداراں  بلوچستان ‘ نوزدھمی سدی ءِ گُڈسر ءَ بهر بهر کرت تاں بلوچ راج ءَ نزور ءُ ایردست بہ دار اَنت ءُ مُلک ءِ راجی سرمایہ ءُ مال ءُ مَڈیاں پُل ءُ پانچ بہ کن اَنت.
نود ءُ سے سال اِنت کہ روایرشتی بلوچستان دَرآمدانی ایردست اِنت ءُ اے دراجیں مُدّت ءَ بلوچ راج چہ وتی دُرستیں هَکّاں زبهر کنگ بوتگ.
ماں اے تھاریں دَور ءَ بلوچ راج ءِ زند ءِ جاورانی بَزگی ءُ پَدمنتگی ءِ مستریں سَوَب  دَرآمدانی انسان دشمنیں سیاست ءُ کارکرد اَنت.
ماں ایردستی ءِ تهاریں سالاں بلوچستان ءِ کُدرتی مال ءُ مَڈّی زوراک ءُ بُرزدستیں ٹولیاں پُل ءُ پانچ کتگ اَنت ءُ گوں وڑ وڑیں پَندلاں گنجیں بلوچستان ءِ آبادی ءُ  دیمروی ءِ دیمپاں بوتگ اَنت. بلوچستان یک استراتژیکی سرزمینے ءُ هر دابیں گنجاں چہ پُرّ ءُ چکاراِنت ، بلے زوراکانی بلوچ دژمنی سیاستانی برکت ءَ ، بلوچانی گیشتریں مھلوک تَنگدست ءُ وار  دارگ بوتگ اَنت ءُ زندجاور اِش سک نگیگ اَنت.  زورانسریں درآمدانی سیاست ءُ کارکِردانی سَوَب ءَ  مرچی بلوچ راج وار تریں، کم دَزرس تریں، ناواننده تریں مهلوکانی شُمار ءَ اِنت ءُ بلوچستان اِش انچو ویران ءُ برباد کتگ کہ مُدامی ڈکّالیں مُلکانی پیم ءَ اِنت.
یک نیمگے پُرگنجیں بلوچستان ءِ ویران کنگ ءُ دگہ نیمگے بلوچ دژمنیں پروژه یانی دیم ءَ بَرَگ. پہ دروَر ” طرح تصرف سواحل بلوچستان” ءُ میلیوناں گئیر بلوچ ءُ درآمد ءِ آرگ ءُ جھمنند کنگ پهک بلوچ دشمنی ءِ سیاستانی دیمبری اِنت. بلوچستان ءِ مُدامی زوربرد کنگ ءُ بلوچ راج ءِ ایر دست دارگ تھران ءِ واکدارانی مستریں مکسد اِنت.
ما مُلک ءُ دَرمُلک ءِ جھمنندیں بازیں بلوچ جُھدکار کہ سالانی سال پہ بلوچستان ءُ راج ءِ ھَکّانی پانکجنی ( دفاع ) ، ءُ ھمے دَرگتاں مُدام بلوچ راج ءِ دژمنانی بَدیں کِرد ءُ سیاستانی رزواہ کنگ ءِ جُھد ءُ بلوچ راج ءِ جُھدانی دیمروی ءُ ھمتوارے ءَ ھم گام بوتگ اِیں ، وتی جُھدانی سیمی گام چِست کرتگ ءُ بلوچستان ءِ راجی تپاکی گَلّ ءِ نام ءَ وتی سیاسی گَلّ ءِ بُنگیجی ءِ جار ءَ جنگ ءَ اِیں.
بلوچستان ءِ راجی تپاکی گلّ انسانی هکّانی جار ءُ جهان ءِ دمکراسی کانود ءُ رهبنداں مَنّ ایت ءُ پہ بلوچستان ءِ وَت مستری ءِ برجاه کنگ ءَ راجی جُهد کنت. هما وت مستری کہ میرپنج ءِ لشکر ماں سال ۱۳۰۷  هجری شمسی ءِ تاکریچاں چہ بلوچ راج ءَ پُل اِت ءُ بلوچستان گوں کُشت ءُ کُشار ءَ آوار جت.
گوں جمهوری اسلامی ءِ پروش ءُ هامنه ای ءِ موری بادشاهی ءِ هلاسی ءَ بلوچ ڈیھہ ءِ آزاتی ءُ مُلک ءِ هما کیمتی بهراں کہ پهلوی پِت ءُ چُکّ ءَ چہ گنجیں بلوچستان ءَ جتا ءُ گوں هراسان ،  کرمان ءُ هرمزگان ءَ هور کت اَنت پد ءَ یکجاه کنگ ءُ تپاکیں بلوچ سرزمین ءَ شامل کنگ  بلوچستان ءِ راجی تپاکی گلّ ءِ استراتژی ءِ بهر اِنت.
بلوچستان ءِ ادارُکی هکومت ءِ ٹهینگ ءُ بلوچستان ءِ راجی دیوان ءِ گچینکاری ءُ برجاه کنگ هم تپاکی گلّ ءِ برنامہ ءِ بُنیاتی بهر اِنت.
ما پَدَّر کنگ لوٹ اِیں کہ بلوچستان ءِ آیوکیں واکداری ( هکومتی) سیستم ءَ بلوچ راج  وت گچین کنت. بلوچ راج ماں یک آزاتیں گچینکاری یے ءَ گوں میان استمانی ( بین المللی ) نماینده یانی کمک ءُ همراهی ءَ  پیسلہ کنت کہ بلوچستان ءِ سیاسی سیستم ءُ هکومت چہ وڑ ءُ شکلے بہ بیت.
بلوچستان ءِ آزاتی ، آبادی ءُ  دیمروی ،  بلوچ راج ءِ آسراتی ءُ زند جاورانی گِهبودی ، سُهل ءُ دوستی  بلوچستان ءِ راجی تپاکی گَلّ ءِ بُنگیج کارانی مُراد ءُ مَکسد اِنت.
مئے باور اِیش اِنت کُل اِیردستیں راج  ھم وتی باندات ( آیندہ ) ءُ وتی مُلک ءِ سیاسی سیستم ءَ وت گچین بکن اَنت. اے آهانی بُنُکی هکّ اِنت.
بلوچستان ءِ راجی تپاکی گَلّ  پہ وتی راجی مکسدانی پوره کنگ ءَ کہ ماں برنامه ءَ نبشتہ کنگ بوتگ اَنت گوں ایردستیں راجاں بزاں کُرد ، ترکمن، عرب الاهوازی، تُرک ءُ لُر مهلوک ءُ کاسپین ءِ مردماں همکاری کنت ءُ پہ جمهوری اسلامی ءِ پروش دیگ ءَ گوں آهاں هم کوپگ اِنت ءُ پہ آزاتیں ءُ گِهتریں بانداتے دیم ءَ رَوت.

6 خرداد 1399 شمسی
 

This post was written by
Comments are closed.