بلوچی ءِ پجّار، سَیَد

بلوچی ءِ پجّار، سَیَد
مارس 4, 2022
19 بازدید

مرچی بلوچی زبان ءِ بے مٹّ ءُ شھدگالیں ھرچ تھر ءِ ندکار نمیرانیں شَھسسّا سَیَد ھاشمی ءِ سالروچ اِنت ۔ مرچی ھرنیمگ ءَ ھر شھر ءَ سید ءِ سالروچ گرگ بَیَگ ءَ اِنت ۔ اے کار ءِ تہ ءَ درست ھور اَنت ۔ بلے من گیشتر وتی ورنا یاں ساڑا یاں کہ اے ڈُبّہ اِش وتی تمردیں کوپگان اش زرتگ اَنت ۔ ایشی ءَ چہ اے ھبر پدّر ءَ بیت کہ مئے ورنا ءُ نوکیں پدریچ ءَ وتی بلوچی ادب ءُ زبان ءَ گوں چنچو ھُبّ ءُ واھگ ھست اِنت ۔ اے دْرست مئے کتہ کاریں زانتکار ءُ ندکارانی جُھدانی مِنّت اِنت کہ آیاں بلوچی زبان ءِ سر ءَ کار کُتگ ۔ آیانی دست ءَ پہ بلوچی زبان ءَ ھرچ کارے کہ بوتگ آیاں کتگ ۔ مرچی اے ھمایانی بَرورد اَنت کہ مئے دیم ءَ اَنت کہ مرچی ما بلوچی نبشتہ کنین ءُ وانیں ۔ما وتی گْوستگیں دَور ءِ نیمگ ءَ چَکّ بہ جنین ءُ بچاریں گڑا ما پہ شرّی ءَ پوہ ءُ سرپد بئیں کہ آیاں وتی زمّہ واری گوں شرّیں دْروشمی ءَ پیلہ کتگ ۔

نی نوکیں پدریچ ءِ وھد اِنت کہ آ وتی زمّہ واریاں پیلہ بکنت ۔ گوں کلّانھیں زانتکار ءُ ندکارانی ( ھمایانی کہ ھست ءُ سلامت اَنت کہ ھاوند آیاں ھست ءُ سلامت بکنت ) گوں ھمایانی ھمراھی ءَ ھمگام بہ بنت ۔ لبزانکی زانشت ءِ پڑ سَک پراہ ءُ شھگان اِنت ۔ نینکہ بلوچی لبزانک ءِ تُنّیگیں پڑ کہ انگت ءَ سرجمیں کار ئِے ایر اَنت ۔ اے پڑ ءَ ھر چُنت وتی زانت ءُ زانشی ءُ سرپدی ءِ بور ءَ تاتک کن ئے بہ تاچ ۔ پہ بلوچی ءَ کار ھلاس نہ بوتگ اَنت ۔ بلکیں پہ بلوچی ءَ انگت ءَ باز کار کنگ لوٹ اِیت ۔ من مرچی ھم ھمے گْوشاں کہ بلوچی دنیگا بنگیجی گام گیجان اِنت ۔ بلوچی زبان کسانیں زبانے نہ اِنت ۔اَنچش کہ ایشی ءِ سرڈگار مزن ءُ شاھگان اِنت ھمے پَیم ءَ بلوچی زبان ءِ جِند وت ھم مزن ءُ شاھگان اِنت ۔ پہ بلوچی ادب ءُ زبان ءَ ھرچ بلوچ زانتکار ءُ کوّاس ءَ کَد وتی زانت ءُ دَسرسی ءُ بستار ءَ کار کتگ ءُ انگت ءَ کار ءَ اَنت ۔

ھمے پَیم ءَ سید ھاشمی ءَ ھم وتی کَچّ ءُ کساس ءُ بستار ءَ کار کت ءُ جِسمانی دْروشم ءَ چَہ مارا جتا بوت ۔ آئی ءِ بستار پہ بلوچی ءَ آئی ءِ زند ءُ ارواہ اِت اَنت کہ پہ بلوچی ءَ ندْر ئِے کت اَنت ۔ بے شَکّ سَیَد ءِ نام ماں مدام بلوچی ادب ءِ تہ ءَ پہ ادب گرگ بیت ۔ ماں بلوچی ادب ءَ چوشیں تَھرے نیست اَت کہ آ چَہ سید ءِ تُنّیگیں ند ءِ زد ءَ نہ بوتگ !

منی ھیال ءَ سید ءِ پَیمیں، ندکار ،لچّہ کار، زبان زانت ،رَم نِبیسّ ، راج دپتر زانت ءُ شوھاز کار کہ اے دْرستیں تَھرانی سر ءَ کار بکنت بلوچی ادب ءِ تہ ءَ انگت ءَ پیداگ نہ بوتگ ۔ سید ھاشمی ءِ کار ءُ ھزمت پہ وتی راج ءُ شھدیں زبان بلوچی ءَ گراں بھا یَنت ۔ آئی ءِ نبشتگیں ھر کتابے پہ بلوچی ءُ بلوچ راج ءَ گَوھر اَنت ۔ آئی ءَ بلوچی زبان ءِ بے ساھیں کُنٹ ءَ ساھے مان کُت ۔ مرچی گِندیں کہ بلوچی زندگ اِنت ھست ءُ سرجم ءُ برجم اِنت ۔ اگاں بہ گْوش ئے سَیَد ءَ وتی ساہ ماں بلوچی زبان ءَ مان کت ءُ اِشت ءُ شُت ۔ اگاں ما بچاریں ناں ایوک ءَ ایش کہ آ ماں بلوچی ادب ءَ چَہ ھر وڑیں ادبی تَھراں چے ھر کس ءَ پیش دست بوتگ بلکیں نوکیں تھرانی درگیجگ ءُ جوڑ کنگ ءِ پاگ ھم ھمائی ءِ سر ءَ بوتگ.

ماں بلوچی ادب ءِ پڑ ءَ سَیَد ءَ وتی زانشت ءِ کُمیت پہ مردی تاتکگ ۔ سَیَد یک مزنیں لچہ کارے بوتگ ۔ آئی ءَ وتی دل ءِ مارشت وتی لچھانی تہ ءَ نبشتہ کتگ اَنت ۔ سَیَد ھاشمی ءَ راجی چاگرد ءِ تہ ءَ یک ڈاہ ءُ آشوبے آورتگ اَت ۔ آئی ءَ وتی لچھانی تہ ءَ وتی پدریچ ءَ اُمیت ۔ آگاھی ، رُژن ۔ جُھد ءُ ھمدستی ءِ پیگام داتگ ۔ سَیَد گْوش اِیت ۔۔۔
سواس بند ءَ مہ اَڑ بْرات ءَ مہ گنّار
کہ چادر آزمانانی دران اِنت

پد ءَ دگہ جاگہ یے گْوش اِیت

راہ تلار ءُ کَرود ءُ چیلّ ءُ گَر اِنت
تئی اولاک پْرشتگ ءُ لنگ اِنت

آئی ءَ سر جمیں زند پہ بلوچی زبان ءِ بودناکی ءِ جھد ءَ گْوازینت ۔ آ پارسی زبان ءُ اَربی زبان ءِ ھم مزنیں کوّاسے بوتگ ۔ اَنچش گْوش اَنت کہ چَہ بلوچی ءَ پیش پارسی ءُ اردو زباناں لچّہ ئِے پِربستگ

1950ءَ بگر دیم پہ اِنگُر بلوچی زبان ءُ ادب ءِ تہ ءَ بلوچی ءِ مزنیں نامے جوڑ بوتگ ۔ آ وھداں بلوچ ندکار شنگ ءُ شانگ ءُ ناتپاک اِت اَنت ۔ ھمے ندکار سَیَد ءَ چِت ءُ یکجاہ ءُ ھمدستی ءِ سکین دات اَنت ۔ آئی ءَ دستونک نوکیں گوناپے بکشات ءُ بلوچی زبان ءِ بادشاہ جوڑ بوت ۔ آئی ءَ مارا گِدار نویسی ءُ آزمانک نویسی ءِ راھاں پرّینت ۔ آئی ءَ بلوچی گِدار نازُک نبشتہ کت ءُ مئے دیم ءَ ایر کُت ۔ سَیَد یکیں وھد ءَ زبان زانت ، لچّہ کار ۔ راج دپتر زانت ۔ شوھاز کار ءُ پَٹپولکار ئِے اَت ۔ آئی ءَ وتی زندمان ءِ کمّیں روچانی تہ ءَ بلوچی زبان ءُ ادب ءَ باز یں تھرانی رنگ دات ءُ شُت ۔ آئی ءَ بلوچی زبان ءُ ادب ءِ زانشتی بنیاد ایر کت ءُ شُت ۔سَیَد بلوچی زبان ءِ شھسوار اَت ۔ آئی ءَ پہ بلوچی زبان ءُ ادب ءَ مزنیں جَنگے کتگ اَت ۔ اگاں ما بچاریں سَیَد اے جنگ ءَ سوبین بوتگ اَت ۔ ما آئی ءَ بلوچی ادب ءُ زانش ءِ شھید بہ بگْوشیں دْروگ نہ اِنت ۔ سَیَد بلوچی ءِ ھر تھرانی تہ ءَ زندگ اِنت ۔ سَیَد ءَ پہ بلوچی ءَ درد ءُ کولنج ءُ کَل کَشّ اتگ ۔ دانکہ بلوچ بلوچی ءُ بلوچستان ھست اَنت کہ دائم ءَ ھست بات اَنت سَیَد ھم ھست ءُ نمیران اِنت ۔

برچسب‌ها:,